இன்று உங்களுக்குக்கான கிருபை
17 ஜுலை 2026
நீதியின் படிப்படியான வெளிப்பாடு!
வேதவசனம்:யோவான் 16:8–10; ரோமர் 1:17; கலாத்தியர் 3:13–14; 2 கொரிந்தியர் 5:21
”…அவர் வந்து, பாவத்தைக்குறித்தும், நீதியைக்குறித்தும், நியாயத்தீர்ப்பைக்குறித்தும் உலகத்தைக் கண்டித்து உணர்த்துவார்… நீதியைக்குறித்து என்னவென்றால், நான் என் பிதாவினிடத்திற்குப் போகிறதினால் இனி என்னை நீங்கள் காணமாட்டீர்கள்…”
யோவான் 16:8,10
கிறிஸ்து இயேசுவுக்குள் இருக்கும் தேவனுடைய நீதியைப்பற்றிய வெளிப்பாடு என்பது ஒரே நேரத்தில் கண்டறியப்படும் ஒன்றல்ல; அது படிப்படியாக வெளிப்படுத்தப்படும் வாழ்நாள் முழுவதுமான ஒரு பயணமாகும்.
அவருடைய நீதியைப்பற்றிய ஒவ்வொரு புதிய வெளிப்பாடும் கிறிஸ்துமீதான உங்கள் நம்பிக்கையை ஆழமாக்குகிறது, உங்கள் விசுவாசத்தை பலப்படுத்துகிறது, மேலும் அவர் செய்து முடித்த கிரியையினால் பெறப்பட்ட ஆசீர்வாதங்களில் நடப்பதற்கான உங்கள் திறனை விரிவுபடுத்துகிறது.
ஆபிரகாமின் ஆசீர்வாதம் மனிதர்களின் கிரியைகளால் அல்ல, மாறாக இயேசு கிறிஸ்து செய்து முடித்த கிரியையின்மீது வைக்கும் விசுவாசத்தின் மூலம் பெறப்படும் நீதியென்னும் ஈவின் மூலமே திறக்கப்படுகிறது என்பதை நாம் புரிந்துகொண்டிருக்கிறோம் (கலாத்தியர் 3:13–14).
இதனால்தான் நீதியைப்பற்றிய செய்தியைக் கேட்பதிலும் தியானிப்பதிலும் நாம் ஒருபோதும் அலட்சியமாக இருக்கக்கூடாது. பவுல் அறிவிப்பதுபோல, “தேவனுடைய நீதி விசுவாசத்தினாலே விசுவாசத்திற்கு என்று வெளிப்படுத்தப்பட்டிருக்கிறது” (ரோமர் 1:17). இந்த வெளிப்பாடு தொடர்ந்து அதிகரித்து, நம்மை விசுவாசம், மகிமை மற்றும் வெளிப்பாட்டின் ஒரு நிலையிலிருந்து மற்றொரு நிலைக்குக் கொண்டு செல்கிறது.
விசுவாசிக்கு கிறிஸ்துவின் நீதியைத் தொடர்ந்து வெளிப்படுத்துவதே பரிசுத்த ஆவியானவரின் முக்கிய ஊழியங்களில் ஒன்றாகும். பரிசுத்த ஆவியானவர் நீதியைக்குறித்து கண்டித்து உணர்த்துவார் என்று இயேசு கூறினார் (யோவான் 16:10). பரிசுத்த ஆவியானவர் விசுவாசிக்குப் பாவத்தை நினைவூட்டுவதில்லை; மாறாக, கிறிஸ்துவின் மூலம் நாம் தேவனுடைய நீதியாக மாற்றப்பட்டிருக்கிறோம் என்பதற்கு அவர் தொடர்ந்து சாட்சியளிக்கிறார்.
ஆகவே, இந்த வெளிப்பாட்டைப் பெற்றுக்கொள்ளும் ஆர்வத்தை வளர்த்துக்கொள்ளுங்கள். நீங்கள் கிறிஸ்துவை நோக்கும்போது, பரிசுத்த ஆவியானவர் உங்கள் நீதியான அடையாளத்தைத் தொடர்ந்து வெளிப்படுத்துகிறார்;அப்போது ஒவ்வொரு உடன்படிக்கை ஆசீர்வாதமும் உங்கள் வாழ்வின் அனுபவமாக மாறுகிறது.
ஜெபம்
பிதாவாகிய தேவனே, கிறிஸ்து இயேசுவுக்குள் நீர் அருளிய நீதியென்னும் ஈவுக்காக உமக்கு நன்றி செலுத்துகிறேன். பரிசுத்த ஆவியானவரே, இந்த சத்தியத்தை என் இருதயத்திற்குத் தொடர்ந்து வெளிப்படுத்தும்; இதனால் நான் என் நீதியான அடையாளத்தில் நம்பிக்கையுடன் வாழவும், கிறிஸ்துவின் செய்து முடிக்கப்பட்ட கிரியையின் மூலம் பெறப்பட்ட ஒவ்வொரு ஆசீர்வாதத்திலும் தினமும் நடக்கவும் எனக்கு உதவும். இயேசுவின் நாமத்தில். ஆமென்.
விசுவாச அறிக்கை
நான் கிறிஸ்து இயேசுவுக்குள் தேவனுடைய நீதியாக இருக்கிறேன். பரிசுத்த ஆவியானவர் என் நீதியான அடையாளத்தை எனக்குத் தொடர்ந்து வெளிப்படுத்துகிறார். நான் கிரியைகளினால் அல்ல, விசுவாசத்தினாலே நடக்கிறேன். ஆபிரகாமின் ஆசீர்வாதம் என் வாழ்வில் செயல்படுகிறது; மேலும் தேவனுடைய ஒவ்வொரு வாக்குத்தத்தமும் கிறிஸ்துவின் மூலம் என்னில் நிறைவேறி வருகிறது. ஆமென்.
உயிர்த்தெழுந்த இயேசுவைப் போற்றுங்கள்.ஆமென். அல்லேலூயா!
⸻
கிருபை நற்செய்தி பேராலயம்!