இன்று உங்களுக்குக்கான கிருபை
25 ஜூன் 2026
தலைப்பு:நோக்கத்தை அறிந்துகொள்வதன் மூலம் ஏற்படும் மாற்றம்
வேதவசனம் :மத்தேயு 4:18–20
இயேசு கலிலேயக் கடலோரமாய் நடந்துபோகையில்,இரண்டு சகோதரர்களைக் கண்டார்… அவர்கள் மீனவர்களாய் இருந்தார்கள்… அவர்களிடம்,”என்னைப் பின்பற்றி வாருங்கள்,உங்களை மனுஷரைப் பிடிக்கிறவர்களாக்குவேன்“என்று கூறினார்.அவர்கள் உடனே தங்கள் வலைகளை விட்டுவிட்டு அவரைப் பின்பற்றினார்கள்.
டாக்டர் மைல்ஸ் மன்ரோ (Dr. Myles Munroe) ஒருமுறை கூறினார்:
“நோக்கம் அறியப்படாதபோது, தவறான பயன்பாடு தவிர்க்க முடியாததாகிறது.”
ஒவ்வொரு படைப்பாளியும் ஒரு பொருளை ஒரு குறிப்பிட்ட நோக்கத்தைக் கருத்தில் கொண்டே வடிவமைக்கிறார். அந்த நோக்கம் தவறாகப் புரிந்துகொள்ளப்படும்போது, அது தவறாகப் பயன்படுத்தப்படுகிறது. உதாரணமாக, ஒரு குளிர்சாதனப் பெட்டியை (refrigerator) வெறும் சேமிப்பு அலமாரியாகப் பயன்படுத்துவது.
இதே கொள்கை மனித வாழ்விற்கும் பொருந்தும்.
- நமது வாழ்விற்கான தேவனுடைய நோக்கம் குறித்த தெளிவு நமக்குக் கிடைக்கும்போது மாற்றம் தொடங்குகிறது.
பேதுருவும் அந்திரேயாவும் தொழிலால் மீனவர்களாக இருந்தனர், ஆனால் தேவனுடைய தெய்வீக நோக்கத்தின்படி அவர்கள் மனுஷரைப் பிடிக்கிறவர்களாக இருந்தனர்.
இயேசு அவர்கள் செய்துவந்த தொழிலை மட்டும் மாற்றவில்லை; மாறாக, அவர்கள் யாராக மாறப் படைக்கப்பட்டார்கள் என்பதை அவர்களுக்கு வெளிப்படுத்தினார். அவருடைய அழைப்பை அவர்கள் உணர்ந்த அந்தத் தருணத்திலேயே,தங்கள் வலைகளை விட்டுவிட்டு அவரைப் பின்பற்றினார்கள்.
அதேபோல, பலரும் – விசுவாசிகள் உட்பட – தற்போதைய சூழ்நிலைகளிலேயே சிக்கிக்கொண்டிருக்கிறார்கள்; ஏனெனில் அவர்கள் தேவனுடைய நித்திய நோக்கத்தை விட, தங்கள் தற்போதைய நிலையையே தங்கள் அடையாளமாகக் கருதுகிறார்கள்.
பரிசுத்த ஆவியானவர் நம் மனதைப் புதுப்பிப்பதன் மூலமும், கிறிஸ்துவுக்குள் நமக்குள்ள உண்மையான அடையாளத்தை வெளிப்படுத்துவதன் மூலமும், தேவன் நமக்காக வடிவமைத்த வாழ்க்கைக்கு நம்மை வழிநடத்துவதன் மூலமும் நம்மை மாற்றுகிறார்.
எனவே, மனதைப் புதுப்பித்துக்கொள்வதன் மூலமும், பரிசுத்த ஆவியானவரின் ஏவுதல்களுக்குக் கீழ்ப்படிவதன் மூலமும், உங்கள் தற்போதைய நிலையிலிருந்து தேவன் தீர்மானித்த நோக்கத்தை நோக்கி நகர்வதே ‘மாற்றம்‘ ஆகும்.
முக்கிய உண்மை:
நோக்கமே செயல்பாட்டைத் தீர்மானிக்கிறது. மாற்றமடைந்த மனம் தேவனுடைய நோக்கத்தைக் காண்கிறது, அவருடைய அழைப்பை ஏற்றுக்கொள்கிறது, மற்றும் அன்றாட வாழ்க்கையை அவருடைய சித்தத்திற்கு ஏற்ப அமைத்துக்கொள்கிறது.
ஜெபம்:
அன்புத் தகப்பனே, என் வாழ்விற்கான உம்முடைய நோக்கத்தை எனக்கு வெளிப்படுத்தியதற்காக உமக்கு நன்றி. உம்முடைய ஆவியினால் என் மனதைப் புதுப்பித்து, என் இருதயத்தை உம்முடைய சித்தத்திற்கு இசைவாக மாற்றி, உம்மை முழு இருதயத்தோடும் பின்பற்ற எனக்குக் கிருபை தாரும்; அப்போதுதான் நீர் என்னை எதற்காகப் படைத்தீரோ, அதற்கேற்றபடி நான் மாற முடியும். இயேசுவின் நாமத்தில். ஆமென்.
விசுவாச அறிக்கை:
கிறிஸ்து இயேசுவுக்குள் நான் தேவனுடைய நீதியாயிருக்கிறேன். எனக்குள் இருக்கும் கிறிஸ்துவே மகிமையின் நம்பிக்கையாயிருக்கிறார். பரிசுத்த ஆவியானவரால் என் மனம் மாற்றப்பட்டு வருகிறது. நான் தேவனுடைய நோக்கத்தின்படி நடக்கிறேன், அவருடைய வழிநடத்துதலைப் பின்பற்றுகிறேன், மற்றும் அவருடைய தெய்வீக நியமனத்தை நிறைவேற்றுகிறேன். இயேசுவின் நாமத்தில், தேவன் எனக்காக ஆயத்தம் செய்துள்ள அனைத்திலும் நான் முன்னேறிச் செல்கிறேன்.இயேசுவின் நாமத்தில். ஆமென்.
உயிர்த்தெழுந்த இயேசுவைப் போற்றுங்கள்.ஆமென். அல்லேலூயா!
⸻
கிருபை நற்செய்தி பேராலயம்!
